منتدي احبــــــــــاء الانبا تكلا بدشنا




 
الرئيسيةالرئيسية  البوابةالبوابة  اليوميةاليومية  س .و .جس .و .ج  بحـثبحـث  التسجيلالتسجيل  facebookfacebook  دخولدخول  
مشاركة


شاطر | 
 

 قصيده جحا

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ادارة المنتدي
ادارة المنتدي
مسئول التصميمات
ادارة المنتدي   مسئول التصميمات


رقم العضو : 1
الجنس : ذكر
تاريخ التسجيل : 02/10/2010
تاريخ الميلاد : 11/09/1992
عدد المساهمات : 804
نقاط : 2269495
السٌّمعَة : 16
العمر : 24

مُساهمةموضوع: قصيده جحا   الثلاثاء 25 يناير 2011 - 0:17

شعور سخيف
إنك تحس بإن وطنك . . شيء ضعيف
صوتك . . ! ضعيف
رأيك . . ! ضعيف

إنك تبيع قلبك وجسمك
وإنك تبيع قلمك وإسمك
ما يجيبوش حق الرغيف

سألوا جحا عن سر ضحكه
قال لك أصل إتنين . . وشبكوا
اللي كان من تحت ميت
واللي كان من فوق كفيف !
ده شعور سخيييييييييييييف .

وشعور سخيف
إنك تكون رمز الشحاته
تبني مبنى للشحاته
تعمل وزارة للشحاته
يا ساقية دوري . . . عدييي فوقي ودوسي
نصبوا عليا . . وشحتوني فلوسي !
ربطوني فيكي .. حتى ما إتغميت ! ؟
هما إللي فرحوا . .ووحدي أنا . .إتغميت ! ؟

أنا اللى صاحب البييييييييييييييييييييييت .
عايش بدون لازمة ؟ .
ولما مرة شكيت . .
إدوني بالجزمة .
مش لاقي تطفح آديك
هاتوا لنا
وجيبولنا وإدونا ودونا . .
هنجيب منين نديك ؟
مش لاقي تطفح آديك ؟

طافح يا بلدي غدايا
ولوعتي غدايا
وآدي الأحبة إلتقوا . . وإتجمعوا عدايا !

أنا اللى زارعك دهب !
بتأكلينى سباخ ؟
ما إن كان ده تقل ودلع ؟
بزيادة دلعك باخ . .
لاشفت فيكي هنا ولا شفت فيكي ترف . . كل اللي فيكي قرف
كرامتنا متهانة
واللقمة بإهانة
بتخلفينا لييييييييييييييه ؟؟؟؟؟ لما إنتى كارهانه !

يعني إيه . . تبقى إنتى هبة النيل يا بوبه ؟
وكل يوم المية تقطع !
يعنى إيه .. لما أشتكي غلو الفاتورة ؟
يقولوا تشكي بس تدفع !

لما قش الرز . . ثروة بتتحرق ! ؟
وأما نفط الأمة . . ثروة بتتسرق ! ؟
وأما جلادك . . على ولادك . . بيبطش ! ؟
وأما علمك ما يلاقيش يآكل . . فـــ . . يطفش ! ؟

يعني إيه نرفع إيدينا بالسلام لأجل الغزاه ؟
ويعني إيه لما أبقى ماشى فى حالى . . اتشد اشتباه ! ؟
يعني إيه . . لما أتحبس أربع سنين حبس إحتياطي؟
حبس إعتباطي ..

يعني إيه مش حاسة بالعمر وغلاوته ! ! ؟
بتصبي مر العمر لييييييييييه ؟

ده أنا كنت ح أوهب لك حلاوته

أنا عمري ما أتأمرت . .
ولا حطيت شروطي .
ومكان ما ترسى مركبك . .
بابني شطوطي .
أنا كنت جيشك . . لما مماليلك باعوكي . .
وكنت يوسف . . لما عشتي سنين عجاف .
وضلوعي دي . . اللي فـــ معركة قادش حموكى . .
وشفايفي دي اللي ما بطلتش فى يوم هتااااف .
أنا كل شبر فى أرضك إتمرمغت فيه . .
وكل يوم عشتيه . .
أنا اتعذبت بيه .
بتكرهيني عيونك السودا وأيامي اللي فاتت
منتيش حبيبتي من النهاردة . . حبيبتي ماتت
مع صوت أدانك جرس
فى الشدة صاحينلك .
من إمتى كانوا الحرس .
هما اللى باقينلك ؟

بعتيني علشانهم ! ؟
وعنيكي معصوبة .
ياهل ترى . . خاينة . .
ولا زيي ؟
مغصوبة .

كل الكلام إتقال . .
والشعر بقيى ماسخ .
والصبر علو جبال . .
والظلم شىء راسخ .

وطن وغرقان في النطاعة
كل شيئ رييحته نطاعة

علمونا بالعصاية . .
ورضعونا الخوف رضاعة .
علمونا . . في المدارس .
يعني إيه كلمة قيام ! ؟
قيــــــام ؟ !
علمونا نخاف من الناظر . .
فيتمنع الكلام .
علمونا إزاي نخاف ! !
وإزاي نكش ! .
بس نسيوا يعلمونا الاحترام .
فمتزعلوش .
فمتزعلوش . .
لما أبقى مش باسمع كلامكم . .
وما تزعلوش . . لما أبقى خارج عـ النظام .

مستنيي إيه من طفل ربوه بالزعاق ؟
غير المشاكل . . والخناق ؟ !
كل اللي بيقول لك بحبك دول نفاق
أنا لما قولت لك بحبك كان نفاق
الحب يعني إتنين بيدوا
مش إيد بتبني وستمية تيييت تيييت يهدوا
الحب حالة
الحب مش شعر وقوالة
الحب يعني : براح فى قلب العاشقين للمعشوقين .
يعنى . . الغلابة يناموا فى الليل دفيانين ! .
الحب يعنى : جواب لكل المسجونين !
هما ليه بقوا مسجونين ؟ !
يعنى أعيش علشان هدف . !
علشان رسالة . !
يعنى أحس بقيمتي فيكي .
وإني مش عايش عوالة .

يعنى لما أعرق . . تكافئينى بعدالة .
الحب : حالة .
الحب : مش شعر وقوالة .

الحب : حاجة . . ما تتوجدشي فى وسط ناس ! ! !
بتجيب غداها من صناديق الزبالة ! ؟ .
الحب : جواكي إستحالة .


____________________________________________________________________________
>
ادارة المنتـــدي
الرجوع الى أعلى الصفحة اذهب الى الأسفل
http://girgs.yoo7.com
 
قصيده جحا
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدي احبــــــــــاء الانبا تكلا بدشنا  :: منتـــــــــــدي المنوعات :: قسم المسرح-
انتقل الى: